చిత్రం న్యూస్ బేల: ఆదిలాబాద్ జిల్లా బేల మండలం సాంగిడి గ్రామంలో ఆధునిక పత్తి వంగడాలపై రైతులకు అవగాహన కల్పించే కార్యక్రమంలో భాగంగా పాలమూర్ సీడ్స్ ఆధ్వర్యంలో పాలమూరు మేజర్ పత్తి రకంపై క్షేత్ర ప్రదర్శన నిర్వహించారు. రైతు భోయర్ సునీల్ చేనులో ఏర్పాటు చేసిన ప్రదర్శన క్షేత్రాన్ని రైతులు పరిశీలించారు. ఈ సందర్భంగా మేజర్ పత్తి రకం ప్రత్యేకాలు సాగు విధానం దిగుబడి సామర్థ్యం తదితర అంశాలపై అవగాహన కల్పించారు. పాలమూరు సీడ్స్ ఎస్ఓ ఉమాకాంత్ రెడ్డి మాట్లాడుతూ..పాలమూరు మేజర్ పత్తి రకం తక్కువ కాలంలో పంట చేతికి రావడంతోపాటు అధిక దిగుబడి అనుకూలంగా ఉంటుందని తెలిపారు. పచ్చ దోమ, తెల్ల దోమ వంటి రసం పీల్చే పురుగులను తట్టుకునే సామర్ధ్యం ఈ రకానికి ఉంటుందన్నారు. రెండో పంట వేసేందుకు ఉపయోగకరంగా ఉండడానికి వివరించారు. ఈ కార్యక్రమంలో ఎస్ఓ ఉమాకాంత్ రెడ్డి, ఎండీఓ రామన్న, ఫీల్డ్ స్టాఫ్ ప్రఫుల్ గౌడ్, రైతులు పాల్గొన్నారు.

కిటకిటలాడిన మండపం

చిత్రం న్యూస్, బేల:  ఆదిలాబాద్ జిల్లా బేల మండల కేంద్రంలోని అశోక్ నగర్ కాలనీలో కుంకుమార్చన కార్యక్రమం శుక్రవారం భక్తిశ్రద్ధలతో ఘనంగా నిర్వహించారు. ఈ కార్యక్రమానికి కాలనీతో పాటు పరిసర ప్రాంతాలకు చెందిన మహిళలు పెద్ద సంఖ్యలో హాజరుకావడంతో మండపం మహిళలతో కిటకిటలాడింది. ఈ సందర్భంగా మహిళలు భక్తిపారవశ్యంతో అమ్మవారికి కుంకుమార్చనలు నిర్వహించి ప్రత్యేక పూజలు చేశారు. అమ్మవారి నామస్మరణలు, భక్తి గీతాలతో మండపం ఆధ్యాత్మిక వాతావరణాన్ని సంతరించుకుంది. మహిళలు సంప్రదాయబద్ధంగా పూజా కార్యక్రమాల్లో పాల్గొని అమ్మవారి అనుగ్రహం తమ కుటుంబాలపై ఉండాలని ప్రార్థించారు. కాలనీలో భక్తి భావాన్ని పెంపొందించడంతో పాటు మహిళల మధ్య ఐక్యత, ఆధ్యాత్మిక చైతన్యాన్ని చాటిచెప్పేలా ఈ కార్యక్రమం సాగింది. మహిళల పెద్ద సంఖ్యలో పాల్గొనడంతో అశోక్ నగర్ కాలనీలో పండుగ వాతావరణం నెలకొంది.

విద్యార్థుల సమగ్ర అభివృద్ధికి క్రీడలు ఎంతో కీలకం..డీఎల్ఎస్ఏ కార్యదర్శి బి.హుస్సేన్

చిత్రంన్యూస్, ఆదిలాబాద్: జిల్లా కేంద్రంలోని ఎరీనా విఎన్ఆర్ మైదానంలో గత ఐదు రోజులుగా జరుగుతున్న అండర్ 14 దసరా కప్ క్రికెట్ పోటీలో భాగంగా గురువారం ఫైనల్ మ్యాచ్ వి ఎన్ ఆర్ అకాడమీ,ఎంసీఏ అకాడమీ మహారాష్ట్ర మధ్య జరిగిన  మ్యాచ్ లో ఆతిథ్య విఎన్ఆర్ జట్టు విజయం సాధించింది. ముందుగా బ్యాటింగ్ చేసిన  ఎంసీఏ జట్టు నిర్ణీత ఓవర్లలో 102 పరుగులు చేయగా ఆతిథ్య జట్టు 18 ఓవర్లలోనే 103 పరుగులు చేసి విజయం సాధించించారు. ఈ కార్యక్రమంలో భాగంగా బహుమతి ప్రధానోత్సవ కార్యక్రమానికి ముఖ్య అతిథిగా జిల్లా న్యాయసేవాధికార సంస్థ కార్యదర్శి బి .హుస్సేన్ హాజరై మాట్లాడారు. విజేతలకు బహుమతులు ప్రధానం చేసి కార్యక్రమాన్ని ఉద్దేశించి విద్యార్థులు చదువుతో పాటు క్రీడలకు కూడా సమాన ప్రాధాన్యత ఇవ్వాలని,చదువు ద్వారా జ్ఞానం,విజ్ఞానం పెంపొందించుకుంటే, క్రీడల ద్వారా శారీరక దృఢత్వం, మానసిక ఉల్లాసం, క్రమశిక్షణ అలవడతాయని వారు పేర్కొన్నారు.క్రీడల్లో పాల్గొనడం ద్వారా విద్యార్థుల్లో జట్టుగా పనిచేసే నైపుణ్యం, నాయకత్వ లక్షణాలు, గెలుపోటములను సమానంగా స్వీకరించే మనస్తత్వం పెంపొందుతాయి. క్రీడలు ఆరోగ్యకరమైన పోటీ తత్వాన్ని పెంచడంతో పాటు భవిష్యత్తులో ఎదురయ్యే సవాళ్లను ధైర్యంగా ఎదుర్కొనే శక్తిని అందిస్తాయని,విజేతలకు,నిర్వాహకులకు అభినందనలు తెలిపారు.ఈ కార్యక్రమంలో డిప్యూటీ లీగల్ ఎయిడ్ డిఫెన్స్ కౌన్సిల్ అరుగుల అశోక్,అసిస్టెంట్ లీగల్ ఎయిడ్ డిఫెన్స్ కౌన్సిల్ ఉమేష్ రావు డోలే,నిర్వాహకులు నరోత్తం రెడ్డి,వివిధ జట్ల కోచ్ లు పాల్గొన్నారు. 

మానసిక ఆరోగ్యంపై అవగాహన పెంచుకోవాలి- డీఎల్ఎస్ఏ కార్యదర్శి బి.హుస్సేన్

చిత్రం న్యూస్,ఆదిలాబాద్: ప్రపంచ మానసిక ఆరోగ్య దినోత్సవం ను పురస్కరించుకొని శుక్రవారం జిల్లా కేంద్రంలోని సంరక్షణ ప్రత్యేక పాఠశాలలో ఏర్పాటు చేసిన విజ్ఞాన సదస్సులో జిల్లా న్యాయ సేవాధికార సంస్థ కార్యదర్శి బి.హుస్సేన్ మాట్లాడుతూ మానసిక ఆరోగ్యంపై అవగాహన ,మానసిక ఆరోగ్యం ప్రాముఖ్యత, ఒత్తిడిని అధిగమించే మార్గాలు, మానసిక సమస్యలతో బాధపడుతున్న వారికి అవసరమైన సహకారంపై అవగాహన కల్పించాల్సిన అవసరం ఉందని, ప్రస్తుత కాలంలో విద్యార్థులు, ఉద్యోగులు, కుటుంబ సభ్యులు వివిధ కారణాలతో మానసిక ఒత్తిడిని ఎదుర్కొంటున్నారు. కుటుంబ సభ్యులతో మనసు విప్పి మాట్లాడటం, తగినంత నిద్ర, వ్యాయామం, యోగా, ధ్యానం వంటి అలవాట్లను పాటించడం మానసిక ఆరోగ్యానికి తోడ్పడతాయి. సమస్యలు ఎక్కువకాలం కొనసాగితే నిపుణుల సలహా తీసుకోవాలని అన్నారు. కార్యక్రమంలో భాగంగా ప్రత్యేక పాఠశాల విద్యార్థులు పేర్చిన బతుకమ్మ వేడుకలు ప్రారంభించడం జరిగింది. అనంతరం పాఠశాలలో మౌలిక వసతులు సదుపాయాల గురించి పాఠశాల విద్యార్థులతో,సిబ్బందితో అడిగి తెలుసుకున్నారు.ఈ కార్యక్రమంలో డిప్యూటీ లీగల్ ఎయిడ్ డిఫెన్స్ కౌన్సిల్ అరుగుల అశోక్,అసిస్టెంట్ లీగల్ ఎయిడ్ డిఫెన్స్ కౌన్సిల్ ఉమేష్ రావు డోలే,  సిబ్బంది,పాఠశాల సిబ్బంది ,ప్రత్యేక పాఠశాల విద్యార్థులు పాల్గొన్నారు.

గిరిజన ప్రాంతాల అభివృద్ధికి ప్రత్యేక ప్రాధాన్యం- ఎమ్మెల్యే పాయల్ శంకర్

చిత్రం న్యూస్, ఆదిలాబాద్ రూరల్: గిరిజన గ్రామాల అభివృద్ధికి ప్రభుత్వం ప్రత్యేక ప్రాధాన్యత ఇస్తోందని ఆదిలాబాద్ ఎమ్మెల్యే పాయల్ శంకర్ అన్నారు. శుక్రవారం ఆదిలాబాద్ రూరల్ మండలంలోని పలు గిరిజన గ్రామాల్లో పర్యటించిన ఎమ్మెల్యే, SDF నిధులతో చేపట్టనున్న కమ్యూనిటీ షెడ్ల నిర్మాణ పనులకు భూమిపూజ చేశారు. చించుఘాట్, పందిరిలోద్ది, అంకాపూర్, లోహారా, తిప్పా గ్రామాల్లో రూ. 5 లక్షల చొప్పున, హట్టిగుట్టలో రూ. 5 లక్షలు, లింగుగూడలో రూ. 25 లక్షలు కలిపి మొత్తం రూ. 55 లక్షల విలువైన అభివృద్ధి పనులకు ఎమ్మెల్యే పాయల్ శంకర్ భూమిపూజ చేసి పనులను ప్రారంభించారు. ఈ కార్యక్రమంలో రూరల్ మండల అధ్యక్షుడు దయాకర్, గ్రామ పటేళ్లు, సర్పంచులు, స్థానిక నాయకులు తదితరులు పాల్గొన్నారు.

గిమ్మలో లబ్ధిదారులకు ఇందిరమ్మ ఇళ్ల పత్రాల పంపిణీ

చిత్రం న్యూస్, భోరజ్: భోరజ్ మండలం గిమ్మ గ్రామంలో శనివారం ఇందిరమ్మ ఇళ్ల పత్రాల పంపిణీ కార్యక్రమం ఘనంగా జరిగింది. గ్రామంలోని అర్హులైన పేద లబ్ధిదారులకు స్థానిక సర్పంచ్ గాజుల ప్రద్యుమ్న, జిల్లా డీసీసీ వైస్ ప్రెసిడెంట్ దీపక్ రావు చేతుల మీదుగా ఇళ్ల పత్రాలను అందజేశారు. ఈ సందర్భంగా వారు మాట్లాడుతూ.. అర్హులైన ప్రతి ఒక్కరికీ సంక్షేమ పథకాలు చేరవేయడమే తమ లక్ష్యమని, నిరుపేదల సొంతింటి కలను నెరవేర్చేందుకు ప్రభుత్వం పారదర్శకంగా లబ్ధిదారులను ఎంపిక చేసిందని తెలిపారు. మిగిలిన అర్హులకు కూడా త్వరలోనే పథకాలు అందేలా కృషి చేస్తామని హామీ ఇచ్చారు. సొంతింటి పత్రాలు అందడంతో లబ్ధిదారులు ఆనందం వ్యక్తం చేశారు. కార్యక్రమంలో స్థానిక ప్రజాప్రతినిధులు, వివిధ పార్టీల నాయకులు, అధికారులు, గ్రామస్తులు పెద్ద సంఖ్యలో పాల్గొన్నారు.