విద్యతో పాటు మంచి వ్యక్తిత్వం.. విద్యార్థికి బలమైన పునాది 

అవగాహన సదస్సులో  వ్యక్తిత్వ వికాస నిపుణుడు మెస్రం నాగేశ్వర్ రావు

చిత్రం న్యూస్, ఆదిలాబాద్: విద్యతో పాటు మంచి వ్యక్తిత్వం విద్యార్థికి బలమైన పునాది అని వ్యక్తిత్వ వికాస నిపుణుడు మెస్రం నాగేశ్వర్ రావు అన్నారు. ఆదిలాబాద్ పట్టణంలోని ప్రభుత్వ కోలాం ఆశ్రమ ఉన్నత పాఠశాలలో IMPACT FOUNDATION ఆధ్వర్యంలో వ్యక్తిత్వ వికాసంపై విద్యార్థులకు అవగాహన సదస్సును  శుక్రవారం నిర్వహించారు. ఫౌండేషన్ కు సంబంధించిన వ్యక్తిత్వ వికాస నిపుణులు మెస్రం నాగేశ్వర్ రావు, జి. వినోద్ కుమార్, జే.అమిత్ నాయక్ ఇతర సభ్యులు పాల్గొని మాట్లాడారు.  విద్యార్థులు ఆత్మవిశ్వాసం, క్రమశిక్షణ, సానుకూల ఆలోచనా విధానం, నాయకత్వ లక్షణాలు, కమ్యూనికేషన్ నైపుణ్యాలు పెంపొందించుకోవాలన్నారు. గాంధీ మార్గంలో నడవాలని, తల్లిదండ్రులను, ఉపాధ్యాయులను గౌరవించాలన్నారు. మంచి వ్యక్తిత్వంతో పాటుగా ఉన్నత చదువులు చదివి మంచి పౌరులుగా ఎదగాలని సూచించారు. అంతకుముందు గాంధీ, లాల్ బహదూర్ శాస్త్రి జయంతి వేడుకలను  నిర్వహించారు. వారి చిత్రపటాలకు పూలమాలలు వేసి ఘనంగా నివాళులర్పించారు.  సిబ్బంది, తదితరులు పాల్గొన్నారు.

మానసిక ఆరోగ్యంపై అవగాహన పెంచడమే ధ్యేయం

‘ పెహచాన్’ సంస్థ ప్రతినిధులు, ప్రచారకర్త సెహర్ హష్మీ

అక్టోబర్ 3న కలెక్టరేట్‌లో ‘బియాండ్ ది హొరైజన్’ కార్యక్రమం

చిత్రం న్యూస్, ఆదిలాబాద్: సమాజంలో మానసిక ఆరోగ్యంపై ఉన్న అపోహలు, విముఖతను తొలగించి, యువతలో మానసిక స్థైర్యాన్ని పెంపొందించడమే లక్ష్యంగా ‘బియాండ్ ది హొరైజన్: ఎ రైడ్ ఫర్ రెసిలియన్స్’ జాతీయ ప్రచార కార్యక్రమాన్ని నిర్వహిస్తున్నట్లు ‘పెహచాన్’ సంస్థ ప్రతినిధులు, మానసిక ఆరోగ్య ప్రచారకర్త సెహర్ హష్మీ తెలిపారు. ఈ ప్రచారంలో భాగంగా అక్టోబర్ 3న మధ్యాహ్నం 2.30 గంటలకు కలెక్టరేట్‌ సమావేశ మందిరంలో ప్రత్యేక ముఖాముఖి, విలేకరుల సమావేశం నిర్వహించనున్నట్లు వెల్లడించారు. మానసిక సమస్యల నుంచి తాను కోలుకున్న అనుభవాలను ఆధారంగా చేసుకుని ప్రజలకు, మానసిక ఆరోగ్య నిపుణులకు మధ్య ఉన్న అంతరాన్ని తగ్గించేందుకు ఈ కార్యక్రమం చేపట్టినట్లు సెహర్ హష్మీ తెలిపారు.

భావోద్వేగ ఆందోళనలు, స్వీయ కరుణ, మానసిక దృఢత్వం వంటి అంశాలపై ఎలాంటి భయం, సంకోచం లేకుండా స్వేచ్ఛగా చర్చించే వాతావరణాన్ని కల్పించడమే ఈ యాత్ర ఉద్దేశమని పేర్కొన్నారు. ఈ ప్రచార యాత్రను ఆగస్టు 20న న్యూఢిల్లీలో ప్రముఖ నటి, మానవతావాది షర్మిలా ఠాగూర్ ప్రారంభించారని తెలిపారు. న్యూఢిల్లీ నుంచి కన్యాకుమారి వరకు, తిరిగి ఢిల్లీ వరకు 50కి పైగా ప్రధాన నగరాల మీదుగా 58 రోజులపాటు యాత్ర కొనసాగుతుందని చెప్పారు.

‘పెహచాన్’ సంస్థ ఆధ్వర్యంలో ఇప్పటికే దేశవ్యాప్తంగా పాఠశాలలు, కళాశాలలు, విశ్వవిద్యాలయాలు, పరిపాలనా కేంద్రాల్లో 100కు పైగా అవగాహన సదస్సులు నిర్వహించి వేలాది మంది విద్యార్థులు, ఉపాధ్యాయులు, స్థానిక నాయకులకు మానసిక ఆరోగ్యంపై అవగాహన కల్పించినట్లు తెలిపారు. యువత, మానసిక సంక్షేమం కోసం చేపడుతున్న ఈ కార్యక్రమాన్ని, మానసిక ఆరోగ్యంపై అవగాహన సందేశాన్ని ప్రజల్లోకి విస్తృతంగా తీసుకెళ్లాలని ‘పెహచాన్’ బృందం కోరింది.

ఆదిలాబాద్ జిల్లాలో కౌశల్ బోధ్ శిక్షణ ప్రారంభం

చిత్రం న్యూస్, ఆదిలాబాద్:  జిల్లాలో మూడు రోజుల కౌశల్ బోధ్ శిక్షణ మంగళవారం ప్రారంభమైంది. ఈ నెల 29, 30 మరియు అక్టోబర్ 1వ తేదీ వరకు ఈ శిక్షణా కార్యక్రమం కొనసాగనుంది. ఈ కార్యక్రమానికి ముఖ్య అతిథులుగా జిల్లా విద్యాధికారి (DEO) మాధవి, AMO లక్ష్మణ్ హాజరయ్యారు. జిల్లా వ్యాప్తంగా వివిధ పాఠశాలల నుండి 135 మంది ఒకేషనల్ ట్రైనర్లు, గణిత, సామాన్య శాస్త్రం, సాంఘిక శాస్త్ర ఉపాధ్యాయులు ఈ శిక్షణకు హాజరయ్యారు. NEP-2020, NCF-2023 మార్గదర్శకాల ప్రకారం ఈ శిక్షణ నిర్వహిస్తున్నట్లు నిర్వాహకులు తెలిపారు. 6 నుండి 8వ తరగతి విద్యార్థులకు నైపుణ్య విద్యలో ఈ శిక్షణ కీలక పాత్ర పోషించనుందని వొకేషనల్ ట్రైనర్ల జిల్లా అధ్యక్షులు సయ్యద్ సబ్దర్ అజీజ్ తెలిపారు. ఈ కార్యక్రమంలో DRPలుగా తొడసం సాయి ఈశ్వర్, బి.అన్వేష్, రాజు రెడ్డి, మొహమ్మద్ కలీం, రవి వ్యవహరించారు.

టీచర్ బదిలీ నిలిపివేయాలి: బేలలో తల్లిదండ్రుల ఆందోళన

చిత్రం న్యూస్, బేల: మండల కేంద్రంలోని అశోక్ నగర్ కాలనీ ఎంపీపీఎస్ పాఠశాలలో పనిచేస్తున్న ఉపాధ్యాయురాలు సంధ్య బదిలీని వెంటనే నిలిపివేయాలని డిమాండ్ చేస్తూ తల్లిదండ్రులు, కాలనీవాసులు ఆందోళన బాట పట్టారు. పాఠశాలలో సంధ్య టీచర్ నాణ్యమైన విద్యను అందిస్తూ పిల్లలపై ప్రత్యేక శ్రద్ధ చూపుతున్నారని, ఇప్పటికే ఉపాధ్యాయుల కొరత ఉందని, ఈ సమయంలో ఆమెను బదిలీ చేయడం వల్ల తమ పిల్లల చదువుకు తీవ్ర నష్టం జరుగుతుందని సోమవారం ఎంపీడీవో మహేశ్ కుమార్‌కు వినతిపత్రం అందజేశారు. ప్రభుత్వ పాఠశాలపైనే నమ్మకంతో పిల్లలను చేర్పిస్తే, టీచర్ బదిలీ వల్ల ప్రైవేట్ పాఠశాలలకు పంపాల్సి వస్తుందని ఆవేదన వ్యక్తం చేశారు. తమ విజ్ఞప్తిని పట్టించుకోకుండా బదిలీ కొనసాగిస్తే పాఠశాలకు తాళం వేసి నిరసన చేపడతామని హెచ్చరించారు. ఈ కార్యక్రమంలో కాలనీవాసులు కట్కర్ల స్వామి, రేసు అనిల్, మాడ హరీష్, గుంజేవార్ నరేష్, అగార్కర్ ఆకాష్, నారాయణ్, కృష్ణ, భూమన్న, వికాస్ తదితరులు పాల్గొన్నారు.

జైనథ్ లో అంగన్‌వాడీ టీచర్లకు సన్మానం

చిత్రం న్యూస్, జైనథ్: ఆదిలాబాద్ జిల్లా జైనథ్ మండల కేంద్రంలోl నిర్వహించిన సేవ సంకల్ప అభియాన్ కార్యక్రమంలో భాగంగా అంగన్‌వాడీ టీచర్లను ఘనంగా సన్మానించారు. ఆదిలాబాద్ లోకసభ సభ్యుడు గోడం నగేష్, బీజేపీ జిల్లా అధ్యక్షుడు పతంగే బ్రహ్మానంద్, జిల్లా మహిళా మోర్చ జిల్లా అధ్యక్షురాలు సుమ, దోని జ్యోతి కలిసి అంగన్‌వాడీ కార్యకర్తలకు శాలువాలతో సత్కరించారు. ఈ సందర్భంగా నాయకులు మాట్లాడుతూ.. సమాజంలో అంగన్‌వాడీ టీచర్లు అందిస్తున్న సేవలు ఎంతో అమూల్యమైనవని కొనియాడారు. గర్భిణులు, బాలింతలు, చిన్న పిల్లల ఆరోగ్య సంరక్షణలో వారి పాత్ర కీలకమన్నారు. నిరంతరం నిస్వార్థంగా సేవలందిస్తున్న వారి శ్రమను గుర్తించి అభినందించడం అందరి బాధ్యత అని పేర్కొన్నారు. ఈ కార్యక్రమంలో స్థానిక జిల్లా బీజీపీ మహిళ మోర్చ ఉపాధ్యక్షురాలు దివ్య, బీజేపీ నాయకులు రమేష్ రెడ్డి, రాకేష్ రెడ్డి, సూర్య రెడ్డి, సిడం రాకేష్, విశాల్ ,అశోక్, అంగన్‌వాడీ సిబ్బంది తదితరులు పాల్గొన్నారు.