కాంగ్రెస్ 1000 రోజుల ప్రజా పాలన సందర్బంగా బైక్ ర్యాలీ

చిత్రం న్యూస్, ఆదిలాబాద్: తెలంగాణలో కాంగ్రెస్ ప్రజా ప్రభుత్వ పాలనకు 1000 రోజులు పూర్తయిన సందర్భంగా ఆదిలాబాద్ జిల్లా కాంగ్రెస్ కమిటీ ఆధ్వర్యంలో శనివారం భారీ బైక్ ర్యాలీ నిర్వహించారు. జిల్లా కాంగ్రెస్ కార్యాలయం నుండి ప్రారంభమైన ర్యాలీ కుమురం భీం చౌక్, ఎన్టీఆర్ చౌక్, వినాయక్ చౌక్, డీటీసీ చౌక్, గాంధీ చౌక్, అంబేద్కర్ చౌక్, నెహ్రూ రోడ్డు, నేతాజీ చౌక్, గర్ల్స్ హైస్కూల్ మీదుగా తిరిగి డీసీసీ కార్యాలయానికి చేరుకుంది. దారి పొడవునా ప్రభుత్వ సంక్షేమ, అభివృద్ధి పథకాలను ప్రజలకు వివరించారు. కాంగ్రెస్, యూత్ కాంగ్రెస్ శ్రేణులు పెద్ద సంఖ్యలో పాల్గొన్నారు. అంబేద్కర్ చౌక్ లో ఏర్పాటు చేసిన సభలో నాయకులు మాట్లాడారు.

ఈ సందర్భంగా డీసీసీ అధ్యక్షుడు డాక్టర్ నరేష్ జాదవ్ మాట్లాడుతూ… గత పదేళ్ల బీఆర్ఎస్ పాలనలో పెండింగ్ లో ఉన్న ప్రజా సమస్యలను కాంగ్రెస్ ప్రభుత్వం ఒక్కొక్కటిగా పరిష్కరిస్తోందన్నారు. అర్హులకు సంక్షేమ పథకాలు అందిస్తూ అభివృద్ధికి ప్రాధాన్యత ఇస్తోందన్నారు.

*కేసీఆర్ రాజీనామా చేసి ప్రజా తీర్పు ఎదుర్కోవాలి – కాంగ్రెస్ నేతల డిమాండ్

పదేళ్ల పాటు రాష్ట్రాన్ని పాలించిన కేసీఆర్ తన హయాంలో రేషన్ కార్డులు, డబుల్ బెడ్ రూం ఇళ్లు వంటి అంశాల్లో ప్రజలు ఎదుర్కొన్న సమస్యలకు సమాధానం చెప్పాలని, రాజకీయ బాధ్యత తీసుకుని రాజీనామా చేసి ప్రజా తీర్పును ఎదుర్కోవాలని కాంగ్రెస్ నాయకులు డిమాండ్ చేశారు. ముఖ్యమంత్రి రేవంత్ రెడ్డి, రాహుల్ గాంధీపై బీఆర్ఎస్ చేస్తున్న వ్యక్తిగత విమర్శలు మాని, నిరుద్యోగం, రైతు సమస్యలు, సంక్షేమం, అభివృద్ధి వంటి ప్రజా సమస్యలపై చర్చ జరగాలని పేర్కొన్నారు. కేంద్రంలోని బీజేపీ ప్రభుత్వం ధరల పెరుగుదల, నిరుద్యోగంపై దృష్టి సారించాలన్నారు. కాంగ్రెస్ పార్టీని గ్రామ స్థాయి నుండి బలోపేతం చేసి రాహుల్ గాంధీని ప్రధానమంత్రిని చేయడమే లక్ష్యంగా పనిచేయాలని పిలుపునిచ్చారు. ఈ కార్యక్రమంలో మాజీ ఎంపీ సోయం బాపురావు, బోథ్ ఇంచార్జ్ ఆడే గజేందర్, గ్రంథాలయ చైర్మన్ మల్లెపూల నర్సయ్య, మార్కెట్ కమిటీ చైర్మన్ బోరంచు శ్రీకాంత్ రెడ్డి, మాజీ డీసీసీ అధ్యక్షుడు సాజిద్ ఖాన్, మాజీ టీపీసీసీ ప్రధాన కార్యదర్శి గండ్రత్ సుజాత, అల్లూరి సంజీవరెడ్డి, ఐఎన్టీయూసీ నాయకుడు మునిగేల నర్సింగ్, యూత్ కాంగ్రెస్ నాయకుడు చరణ్ గౌడ్, మీడియా కోఆర్డినేటర్ మేకల జితేందర్, ఎస్సీ సెల్ చైర్మన్ పరమేశ్వర్ తదితరులు పాల్గొన్నారు.

బాసర అమ్మవారికి తెలుగు అక్షరమాలతో చేనేత పట్టుచీర

చిత్రం న్యూస్ బాసర : నిర్మల్ జిల్లా సిరిసిల్లకు చెందిన నల్ల పరంధాములు కుమారుడు నల్ల జగదీష్ నేసిన చేనేత తెలుగు అక్షరమాల పట్టుచీరను మేళ తాళాల మధ్య శుక్రవారం బాసర సరస్వతి అమ్మవారికి ఆలయ ఈవో అంజనాదేవి వేద పండితుల సమక్షంలో సమర్పించారు.నల్ల జగదీష్ నేత చేనేత మగ్గముపై తెలుగు అక్షరమాలను పట్టుచీరపై నేయడానికి సంకల్పించుకొన్నారు. 15 రోజుల్లో ఆరు మీటర్ల 30 సెంటీమీటర్ల వస్త్రము 650 గ్రాములతో  నేశారు. సున్నిహితమైన పనితనముతో ఈ వస్త్రాన్ని తయారుచేసి పద్మశాలీల వృత్తి నైపుణ్యాన్ని తెలంగాణ వ్యాప్తంగానే కాకుండా దేశ విదేశాలలో ఖ్యాతిని పెంపొందించేలా చేశారు. చేనేత పరిశ్రమ.. మిల్లు వస్త్రములతో పోటీ పడలేక కునారిలుతుందని తెలిసిందే.. చేనేత ఎప్పటికప్పుడు వృత్తి కళాకారుల నైపుణ్యముతో ప్రజల మనసులకు దగ్గరయ్యే వస్త్రాలను తయారు చేస్తూ మనకంటూ ఓ గుర్తింపు తెచ్చుకున్నారు. కార్యక్రమంలో సత్ర అధ్యక్షులు శ్రీ రాపోల్ సుధాకర్, కార్యనిర్వహక అధ్యక్షులు, గుజ్జ రాజేశ్వరి,ప్రధాన కార్యదర్శిలు రమణ విశ్వం, శ్యామ్, స్థానిక సర్పంచ్ తీగల వెంకటేష్ గౌడ్,కొక్కుల గంగాధర్, మోరే సాయిలు, ఎలగందుల శ్రీనివాస్ ఓని స్వామి ,రువ్విపోశెట్టి, మేకల అశోక్ ,అంకం రమేష్ గ్రామ పద్మశాలి సంఘం నాయకులు పాల్గొన్నారు.

కాంగ్రెస్ వైఫల్యాలపై బాసరలో  బీఆర్ఎస్ నిరసన

*ఇచ్చిన 420 హామీలు నెరవేర్చలేదని భారీ బహిరంగ ర్యాలీ 

​చిత్రం న్యూస్, బాసర: నిర్మల్ జిల్లా బాసర మండల కేంద్రంలో కాంగ్రెస్ ప్రభుత్వం ప్రజలకు ఇచ్చిన హామీలను నెరవేర్చడంలో తీవ్రంగా విఫలమైందని ఆరోపిస్తూ బాసర పుణ్యక్షేత్రంలో భారీ బహిరంగ ర్యాలీ నిర్వహించారు. ఎన్నికల ప్రచారంలో భాగంగా ఇచ్చిన 420 హామీలు, ఆరు గ్యారంటీలు అమలుకాకుండా ప్రకటనలకే పరిమితమయ్యాయని ఆందోళనకారులు మండిపడ్డారు. ఈ ర్యాలీలో సమన్వయకర్త కిరణ్ కొమ్రేవార్, శ్యాంసుందర్ , గద్దేకర్ విలాస్, బాసర మండల అధ్యక్షుడు శ్యామ్ ,పెద్ద సంఖ్యలో కార్యకర్తలు, స్థానిక ప్రజలు పాల్గొని ప్రభుత్వ వ్యతిరేక నినాదాలతో హోరెత్తించారు.

​ప్రధాన డిమాండ్లు మరియు విమర్శలు

అమలుకాని హామీలు కాంగ్రెస్ పార్టీ ఇచ్చిన 420 హామీల్లో ఎక్కువ భాగం అమలుకు నోచుకోలేదని, ప్రజలను గాలికి వదిలేశారని విమర్శించారు. రైతులు, నిరుద్యోగుల మోసం, రైతు భరోసా, రుణమాఫీ, నిరుద్యోగ భృతి, మహిళలకు ఉచిత పథకాల అమలులో ప్రభుత్వం కాలయాపన చేస్తోందని ఆగ్రహం వ్యక్తం చేశారు. బాకీ కార్డుల పంపిణీ అమలు కాకుండా మిగిలిపోయిన హామీలను వివరిస్తూ ప్రజలకు బాకీ కార్డులను పంపిణీ చేశారు. ​ఉద్యమం ఇక్కడితో ఆగదని, ప్రభుత్వం వెంటనే స్పందించి ప్రతి ఒక్క హామీని నెరవేర్చే వరకు పోరాటాన్ని కొనసాగిస్తామని నాయకులు స్పష్టం చేశారు. ఈ కార్యక్రమంలో పెద్ద కప్ గంగాధర్, రవి మంతెన పోశెట్టి ,జాజోళ్ల రాజు, జాజోళ్ల అశోక్, శివన్న తదితరులు పాల్గొన్నారు.

* భక్తులతో కిక్కిరిసిన శ్రీకృష్ణ ఆలయం

చిత్రం, బాసర: నిర్మల్ జిల్లా బాసరలోని శ్రీకృష్ణ ఆలయంలో శ్రీ కృష్ణాష్టమి వేడుకలు అత్యంత వైభవంగా జరుగుతున్నాయి.ఈ పవిత్ర పర్వదినాన్ని పురస్కరించుకుని గోపాలకృష్ణ స్వామి వారికి ఆలయ అర్చకులు భూమన్న యాదవ్ పాలు, పెరుగు, వెన్న, తేనె వంటి పంచామృతాలతో అభిషేకాలు జరిపి ప్రత్యేక నైవేద్యాలను సమర్పించారు. తెల్లవారుజాము నుంచే భక్తులు ప్రత్యేక పూజలు చేసి తమ మొక్కులను చెల్లించుకున్నారు.శ్రీకృష్ణ ఆలయ కమిటీ ఆధ్వర్యంలో రేపు శ్రీకృష్ణుని పల్లకి సేవ, చిన్నారులకు శ్రీకృష్ణుడి, రాధమ్మల వేషధారణ, ఉట్టి కొట్టడం పోటీలను ఏర్పాటు చేసి వారికి స్వామి వారి ప్రతిమలను అందజేయనున్నారు. అనంతరం భక్తులకు అన్నప్రసాదం పంపిణీ చేయనున్నట్లు నిర్వాహకులు తెలిపారు.

పంచాయతీ కార్యదర్శి పై చర్యలు తీసుకోండి: బాసర ఎంపీడీవోకు వినతి పత్రంఅందజేత

చిత్రం న్యూస్, బాసర: నిర్మల్ జిల్లా బాసర మండలంలోని దొడాపూర్ గ్రామంలో విధులు నిర్వహిస్తున్న గ్రామ కార్యదర్శి మమతపై చర్యలు తీసుకోవాలంటూ గ్రామ సర్పంచ్ సతీష్ తో పాటు ఉపసర్పంచ్ విజయ్ వార్డు సభ్యులు, గ్రామస్తులు బాసర ఎంపీడీవో దేవేందర్ రెడ్డికి వినతి పత్రం అందజేశారు. ఈ సందర్భంగా గ్రామస్తులు పేర్కొన్న ప్రకారం గ్రామంలో పంచాయతీ కార్యదర్శి విధులపై అసమర్ధత చూపుతూ సమయానికి రాకుండా వచ్చిన సమయానికి ముందే ఇంటికి వెళ్లిపోవడం సర్పంచ్ తో పాటు పలువురులను గౌరవించకపోవడం విధి నిర్వహణలో భాగంగా గ్రామస్తులకు దురుసుగా మాట్లాడడం. తమ యొక్క పరివర్తనను మార్చుకోవాలని గ్రామస్తులు చెప్పిన పట్టించుకోకపోవడం, గ్రామంలో ప్రత్యేక సమావేశం నిర్వహించగా నేను ఇక్కడ విధులు నిర్వహించను అంటూ సదరు గ్రామ పంచాయతీ కార్యదర్శి చెప్పడంతో..వేరే పంచాయతీ కార్యదర్శి నియమించండి అంటూ గ్రామస్తులు బాసర మండల ఎంపీడీవోకు వినతిపత్రం అందజేశామని పేర్కొన్నారు.

కీర్గుల్ (కె) ప్రభుత్వ పాఠశాలలో ముందస్తు కృష్ణాష్టమి వేడుకలు

చిత్రం న్యూస్, బాసర: నిర్మల్ జిల్లా బాసర మండలం  ​కీర్గుల్ (కె)గ్రామంలోని ప్రభుత్వ ప్రాథమిక పాఠశాలలో ముందస్తు కృష్ణాష్టమి వేడుకలను అత్యంత ఘనంగా నిర్వహించారు. ఈ వేడుకల్లో భాగంగా పాఠశాల విద్యార్థులు శ్రీకృష్ణుడు, గోపికల వేషధారణలతో అలరించారు. పిల్లల నృత్యాలు, సాంస్కృతిక కార్యక్రమాలు అందరినీ ఆకట్టుకున్నాయి. ఈ కార్యక్రమంలో పాఠశాల ఉపాధ్యాయులు, రవళిక, భవాని, గ్రామస్థులు తదితరులు పాల్గొన్నారు.