నకిలీ ఎరువుల రాకెట్ గుట్టురట్టు: ఇద్దరు అరెస్ట్

చిత్రం న్యూస్, జైనథ్: అమాయక రైతులే లక్ష్యంగా సాగుతున్న నకిలీ ఎరువుల విక్రయాల ముఠా ఆట కట్టించారు. జైనథ్ పోలీసులు, వ్యవసాయ శాఖ అధికారులు సంయుక్తంగా నిర్వహించిన దాడులలో ఈ నకిలీ ఎరువుల రాకెట్ గుట్టురట్టయింది.

నల్గొండ జిల్లాకు చెందిన  ఏపురి కృష్ణయ్య, జైనథ్ మండలం కంట గ్రామానికి చెందిన బట్ట మహేందర్‌గా నిందితులను గుర్తించి, వారిని అరెస్ట్ చేసి రిమాండ్‌కు తరలించారు. ఈ దాడులలో నిందితుల నుండి 60 నకిలీ ఎరువుల బస్తాలతో పాటు ఒక కారు, బైక్, మొబైల్ ఫోన్లు, నకిలీ బిల్ బుక్కులను పోలీసులు స్వాధీనం చేసుకున్నారు.

పంట దిగుబడిని, భూసారాన్ని కాపాడుకోవడానికి రైతులు కేవలం గుర్తింపు పొందిన డీలర్ల వద్ద మాత్రమే ఎరువులు కొనుగోలు చేయాలని, కొనుగోలు చేసినప్పుడు తప్పనిసరిగా బిల్లులు తీసుకోవాలని అధికారులు సూచించారు.

జనాభా గణనలో సెల్ఫ్ ఎన్యూమరేషన్ పూర్తి చేసిన కలెక్టర్ రాజర్షి షా

చిత్రం న్యూస్, ఆదిలాబాద్: జాతీయ జనాభా గణన సర్వేలో భాగంగా జిల్లా కలెక్టర్ రాజర్షిషా గురువారం కలెక్టర్ క్యాంపు కార్యాలయంలోని తన ఛాంబర్‌లో ‘సెల్ఫ్ ఎన్యూమరేషన్’ ప్రక్రియను పూర్తి చేశారు. కేంద్ర, రాష్ట్ర ప్రభుత్వాల మార్గదర్శకాల మేరకు డిజిటల్ పద్ధతిలో నిర్వహిస్తున్న ఈ కార్యక్రమంలో కలెక్టర్ స్వయంగా పాల్గొని మొబైల్, ఆన్‌లైన్ పోర్టల్ ద్వారా తన కుటుంబ వివరాలను నమోదు చేసుకున్నారు. ప్రజలంతా సెల్ఫ్ ఎన్యూమరేషన్ విధానాన్ని వినియోగించుకోవాలని ఈ సందర్భంగా కోరారు.
ఈ కార్యక్రమంలో సెన్సెస్ నోడల్ అధికారులు, వివిధ ప్రభుత్వ శాఖల అధికారులు, సిబ్బంది పాల్గొన్నారు.

విజయ డైరీ నూతన డిప్యూటీ డైరెక్టర్‌గా శ్రీనివాస్ బాధ్యతల స్వీకరణ

చిత్రం న్యూస్, ఆదిలాబాద్: విజయ డైరీ నూతన డిప్యూటీ డైరెక్టర్‌గా బాధ్యతలు స్వీకరించిన శ్రీనివాస్ గురువారం కలెక్టరేట్‌లో జిల్లా కలెక్టర్ రాజర్షిషాను మర్యాదపూర్వకంగా కలిసి పుష్పగుచ్ఛం అందించారు.ఈ సందర్భంగా జిల్లాలో పాల ఉత్పత్తుల అభివృద్ధి, రైతులకు అందించే సేవలు, విజయ డైరీ చేపడుతున్న కార్యక్రమాలపై కలెక్టర్‌తో చర్చించారు. పాడి రైతుల సంక్షేమానికి తీసుకోవాల్సిన చర్యలు, విజయ డైరీ ద్వారా అందించే సౌకర్యాలపై సమీక్షించారు.

రాజీవ్ గాంధీ సేవలు యువతకు స్ఫూర్తి: డీసీసీ అధ్యక్షుడు డా.నరేష్ జాదవ్

చిత్రం న్యూస్, ఆదిలాబాద్: మాజీ ప్రధాని స్వర్గీయ రాజీవ్ గాంధీ వర్ధంతిని జిల్లా కాంగ్రెస్ కార్యాలయంలో ఘనంగా నిర్వహించారు. ఏఐసీసీ ఆదివాసీ కాంగ్రెస్ నేషనల్ కో-ఆర్డినేటర్ కుసుమ్ ఆలం, జిల్లా కాంగ్రెస్ అధ్యక్షులు డా. నరేష్ జాదవ్, జిల్లా కాంగ్రెస్ నాయకులు రాజీవ్ గాంధీ చిత్రపటానికి పూలమాలలు వేసి నివాళులర్పించారు.

ఈ సందర్భంగా డా. నరేష్ జాదవ్ మాట్లాడుతూ రాజీవ్ గాంధీ జీవితం యువతకు ఎంతో స్ఫూర్తిదాయకమన్నారు. యువతకు పెద్దపీట వేశారని, పంచాయతీరాజ్ చట్టం ద్వారా మహిళలకు అవకాశం కల్పించారని కొనియాడారు. దేశంలో ఐటీ రంగానికి పునాది వేసి భారత్ ఐటీ రంగంలో ముందుండడానికి కారణమయ్యారని తెలిపారు. దేశ సమగ్రత, శాంతి, ప్రజాస్వామ్య విలువల కోసం తన జీవితాన్ని సమర్పించారని అన్నారు. దేశ సార్వభౌమత్వాన్ని కాపాడే క్రమంలో తమిళనాడులో అసాంఘిక శక్తుల చేతిలో స్వర్గస్తులవడం బాధాకరమని, ఆయన ఇంకొన్ని రోజులు బతికి ఉంటే దేశం ప్రపంచంలోనే అగ్రగామిగా ఉండేదని ఆవేదన వ్యక్తం చేశారు.

రాజీవ్ గాంధీ వర్ధంతిని దేశవ్యాప్తంగా “ఉగ్రవాద వ్యతిరేక దినం”గా పాటిస్తున్న సందర్భంగా ప్రతి భారతీయుడు హింసకు వ్యతిరేకంగా, శాంతి, సామరస్యం, సౌభ్రాతృత్వాన్ని పరిరక్షించాలని పిలుపునిచ్చారు. ఈ కార్యక్రమంలో మాజీ టీపీసీసీ జనరల్ సెక్రటరీ గండ్రత్ సుజాత, ఆదిలాబాద్ మార్కెట్ చైర్మన్ బోరంచు శ్రీకాంత్ రెడ్డి, మున్సిపల్ చైర్మన్ బండారి అనూష సతీష్, మాజీ మార్కెట్ చైర్మన్ అల్లూరి సంజీవరెడ్డి, తెలంగాణ రాష్ట్ర ఆదివాసీ కాంగ్రెస్ వైస్ చైర్మన్ సెద్మకి ఆనంద్ రావు, పట్టణ కాంగ్రెస్ అధ్యక్షులు ఖిజార్ పాషా, జిల్లా కాంగ్రెస్ జనరల్ సెక్రటరీలు బండి దేవిదాస్ చారీ, గౌలి సంజయ్, సుమ, మందకిని, ఉయకే అనసూయ, మున్సిపల్ కౌన్సిలర్ స్వాతి మంగేష్, గుడిహత్నూర్ మండల కాంగ్రెస్ అధ్యక్షులు తొడసం దౌలత్ రావు, జిల్లా కాంగ్రెస్ నాయకులు, కార్యకర్తలు పాల్గొన్నారు.