ఇంటర్ ఫలితాల్లో పెద్దోళ్ల సాత్విక ఉత్తమ ప్రతిభ 

చిత్రం న్యూస్, బాసర :నిర్మల్ జిల్లా బాసర గ్రామానికి చెందిన పెద్దోళ్ల సాత్విక అనే విద్యార్థిని ఇంటర్మీడియట్ మొదటి సంవత్సరంలో అత్యుత్తమ ప్రతిభ కనబరిచింది. హైదరాబాదులోని ఓ ప్రైవేట్ కళాశాలలో బైపీసీ మొదటి సంవత్సరం చదువుతున్న పెద్దోళ్ల సాత్విక 440 మార్కులకు గాను 438 మార్కులు సాధించి విశేష ప్రతిభ కనబరిచింది. సాత్విక ప్రతిభ కనబరచడంతో ఆమె తల్లిదండ్రులు పెద్దోళ్ల పుష్పలత రవి దంపతులు ఆనందంలో మునిగిపోయారు. తమ కుమార్తె కష్టపడి చదివి ఈ స్థాయికి చేరుకోవడం పట్ల గర్వంగా ఉందని వారు తెలిపారు. గ్రామంలోని పెద్దలు, ఉపాధ్యాయులు, స్నేహితులు ఆమెను అభినందిస్తూ భవిష్యత్తులో ఇంకా ఉన్నత శిఖరాలను అధిరోహించాలని ఆకాంక్షించారు. ఈ సందర్భంగా తల్లిదండ్రులు కాలనీవాసులు కలిసి సాత్విక ను సన్మానించి ఆమెను ప్రశంసించారు. క్రమశిక్షణ, పట్టుదల, కష్టపడి చదివితే ఎలాంటి లక్ష్యాన్ని అయినా అవలీలగా సాధించవచ్చని సాత్విక నిరూపించి చూపిందని వారు పేర్కొన్నారు.

* ఇంటర్ ఫలితాల్లో ఉత్తీర్ణులైన విద్యార్థులకు అభినందనలు

* ఫలితాల పట్ల ఆందోళన చెందవద్దని విద్యార్థులకు సూచన

* ఓటమి గెలుపుకు తొలిమెట్టుగా భావించాలని పిలుపు

చిత్రం న్యూస్, నిర్మల్ బ్యూరో : ఇంటర్మీడియట్ పరీక్షా ఫలితాల్లో ఉత్తీర్ణులైన విద్యార్థులకు అభినందనలు తెలుపుతూనే, మార్కులు తక్కువ వచ్చినా లేదా ఫెయిల్ అయినా ఆందోళన చెందవద్దని కుంటాల మండల బీజేపీ జిల్లా నాయకులు, మాజీ ఎంపీపీ జివి.రమణరావు విద్యార్థులకు సూచించారు. జీవితంలో పరీక్షలు ఒక భాగం మాత్రమేనని, వాటిని ఎదుర్కొనే ధైర్యం కలిగి ఉండాలని ఆయన అన్నారు. విడుదలైన ఇంటర్ ఫలితాలపై కొందరు విద్యార్థులు ఆందోళన చెందుతున్న నేపథ్యంలో, జివి.రమణరావు ఒక ప్రకటన విడుదల చేశారు. పాస్ అయిన వారికి శుభాకాంక్షలు తెలుపుతూనే, ఫెయిల్ అయిన వారికి ధైర్యం చెప్పారు. పరీక్షలు మళ్లీ రాసుకోవచ్చని, కానీ జీవితం తిరిగి రాదని, కాబట్టి ఎవరూ ఆత్మహత్య వంటి అనాలోచిత నిర్ణయాలు తీసుకోరాదని ఆయన విజ్ఞప్తి చేశారు. తల్లిదండ్రుల ఆశలను గుర్తుంచుకోవాలని, వారిని బాధపెట్టే పనులు చేయవద్దని రమణరావు విద్యార్థులకు సూచించారు.

విద్యార్థుల భవిష్యత్తుకు పరీక్షా ఫలితాలే సర్వస్వం కాదని, వారిలోని ప్రతిభను గుర్తించి ప్రోత్సహించాలని ఆయన అన్నారు. భవిష్యత్తులో అనేక అవకాశాలు వస్తాయని, వాటిని సద్వినియోగం చేసుకోవాలని ఆయన తెలిపారు.ఏదైనా విషయంలో విఫలమైనా, దానిని ఒక అనుభవంగా స్వీకరించి, మరింత పట్టుదలతో ముందుకు సాగాలని ఆయన విద్యార్థులకు సలహా ఇచ్చారు. ఓటమిని గెలుపునకు తొలిమెట్టుగా భావించి, ఎల్లప్పుడూ ఆత్మవిశ్వాసంతో ఉండాలని ఆయన కోరారు. మానసికంగా దృఢంగా ఉంటేనే ఏదైనా సాధించగలమని ఆయన పేర్కొన్నారు.ఈ ప్రకటన ద్వారా, విద్యార్థులకు మానసిక స్థైర్యాన్ని అందించడమే లక్ష్యంగా జివి.రమణరావు తమ అభిప్రాయాలను వ్యక్తం చేశారు. విద్యార్థులందరూ ఉన్నత శిఖరాలను అధిరోహించాలని ఆయన ఆకాంక్షించారు. తల్లిదండ్రులు కూడా తమ పిల్లలను ప్రోత్సహించడం ద్వారా వారి భవిష్యత్తుకు బాటలు వేయాలని ఆయన సూచించారు.

ముథోల్ ప్రెస్ క్లబ్ నూతన కార్యవర్గం ఎన్నిక

చిత్రం న్యూస్, బాసర : నిర్మల్ జిల్లా ముథోల్ మండల ప్రెస్ క్లబ్ నూతన కార్యవర్గాన్ని ఆదివారం ఏకగ్రీవంగా ఎన్నుకున్నారు. మండల కేంద్రంలోని ప్రింట్ అండ్ ఎలక్ట్రానిక్ మీడియా (ప్రెస్ క్లబ్) విలేకరులు అందరూ సమావేశమై కమిటీని ఎన్నుకున్నారు. ప్రెస్ క్లబ్ అధ్యక్షుడిగా జింద్లే సునీల్, ఉపాధ్యక్షులుగా సొన్కాంబ్లే రాహుల్, మల్లేష్ , ప్రధాన కార్యదర్శిగా ముఫ్తీ రాయిస్ ఖాస్ మి , కోశాధికారిగా దొంతుల్వార్ రమేష్, సంయుక్త కార్యదర్శిగా శరత్  గైక్వాడ్ లను ఎన్నుకున్నారు, సభ్యులు దుర్గాప్రసాద్, మురళిగౌడ్, తిరుపతి గౌడ్, విజయ్, పి.నాగేష్, నాగేష్, పవన్, బషీర్, అజీమ్, సుభాష్, గంగారెడ్డి తదితరులు పాల్గొన్నారు.

బాసర అమ్మవారి ఆలయానికి పోటెత్తిన భక్తులు

చిత్రం న్యూస్, బాసర : దక్షిణ భారతదేశంలోనే ప్రసిద్ధ పుణ్యక్షేత్రం నిర్మల్ జిల్లా బాసరలోని శ్రీ జ్ఞాన సరస్వతి అమ్మవారి దర్శనానికి ఆదివారం పెద్దసంఖ్యలో భక్తులు తరలివచ్చారు. ఆదివారం సెలవు దినం కావడంతో వివిధ ప్రాంతాల నుంచి వచ్చిన భక్తులు పవిత్ర గోదావరి నదిలో పుణ్యస్నానాలు ఆచరించి అమ్మవారికి ప్రత్యేక పూజలు నిర్వహించారు. తమ చిన్నారులకు అమ్మవారి సన్నిధిలో అక్షర శ్రీకార పూజలను చేశారు. అమ్మవారి దర్శనం కోసం మహారాష్ట్ర, కర్ణాటక, ఆంధ్రప్రదేశ్, తెలంగాణ రాష్ట్రాల నుంచి రైలు, రోడ్డు మార్గాల ద్వారా భక్తులు తరలివచ్చారు. అమ్మవారి దర్శనానికి క్యూలైన్లో వేచి ఉన్న భక్తుల కోసం మజ్జిగ, చల్లటి నీరు ప్రత్యేక ఏర్పాట్లను చేశారు . భక్తులకు సుమారు రెండు గంటల సమయం దర్శనానికి పట్టింది. భక్తులకు ఇబ్బందులు కలగకుండా ఆలయ ఈవో విజయరామరావు, బాసర సీఐ కిరణ్, పోలీస్ సిబ్బంది తగిన ఏర్పాట్లు చేశారు.