చిత్రం న్యూస్, బేల: విద్యార్థులు చక్కగా చదువుకొని ఉన్నంతంగా ఎదగాలని గూడ సర్పంచ్ గోడే అవినాష్ అన్నారు. ఆదిలాబాద్ జిల్లా బేల మండలం గూడ గ్రామంలోని MPPS పాఠశాలలో విద్యార్థులకు పరీక్ష ప్యాడ్లు, పుస్తకాలు, పెన్నులను, అంగన్వాడీ కేంద్రంలో చిన్నారులకు అక్షరమాల పుస్తకాలను గురువారం అందజేశారు.

ఈ సందర్భంగా సర్పంచ్ గోడే అవినాష్ మాట్లాడుతూ.. విద్యార్థులు చక్కగా చదువు కోవాలని, విద్యతోనే అభివృద్ధి సాధ్యమని పేర్కొన్నారు. ఇలాంటి కార్యక్రమాలతో విద్యార్థులకు ప్రోత్సాహం కలుగుతుందని తెలిపారు. ఈ కార్యక్రమంలో ఉపసర్పంచ్ శ్రీరామే నిఖిల్, వార్డు సభ్యులు ఠాక్రే సుమిత్, గవాండే సందీప్, పాఠశాల ఉపాధ్యాయురాలు అనూష, అంగన్వాడీ ఉపాధ్యాయురాలు గవాండే మీనా, వీ.అనిల్, దశరథ్ అనిల్ తదితరులు పాల్గొన్నారు.

చిత్రం న్యూస్, ఆదిలాబాద్: ఆదిలాబాద్ జిల్లా కేంద్రంలో ప్రజాపాలన – ప్రగతి ప్రణాళిక ఆరోగ్య వారోత్సవాలలో భాగంగా ఆహార భద్రత శాఖ ఆధ్వర్యంలో నిర్వహించిన వాకథాన్‌ను అదనపు కలెక్టర్ రాజేశ్వర్ ప్రారంభించారు. రిమ్స్ ఆసుపత్రి నుండి జిల్లా పరిషత్ కార్యాలయం వరకు నిర్వహించిన ఈ వాకథాన్‌లో అధికారులు, అంగన్వాడీలు, విద్యార్థులు పాల్గొన్నారు. అనంతరం జడ్పీ సమావేశ మందిరంలో నిర్వహించిన సమావేశంలో అదనపు కలెక్టర్ ప్రసంగించి, ఫుడ్ లైసెన్స్ లను అందజేశారు. ఈ కార్యక్రమంలో జిల్లా ఆహార భద్రత అధికారి ప్రత్యూష, జిల్లా సంక్షేమ అధికారి మిల్కా, జిల్లా వైద్యారోగ్య శాఖ అధికారి నరేందర్ రాథోడ్, రిమ్స్ డైరెక్టర్ జై సింగ్ రాథోడ్, ఫుడ్ సేఫ్టీ కంట్రోలర్ నాయక్, వైద్యులు దీపక్ పుష్కర్, నరేందర్ పాల్గొన్నారు.

చిత్రం న్యూస్, బేల: బేల మండలం అవాల్పూర్ గ్రామ అంగన్‌వాడీ కేంద్రాన్ని గ్రామ సర్పంచ్ అనిల్ బుధవారం సందర్శించారు. అక్కడి పరిస్థితులను, కార్యక్రమాలను పరిశీలించారు. కేంద్రంలోని పిల్లల సంఖ్య, వారికి అందిస్తున్న పౌష్టికాహార పంపిణీ విధానం, కేంద్రం యొక్క నిర్వహణ గురించి ఆరా తీశారు. అంగన్‌వాడీ టీచర్, సహాయకురాలితో మాట్లాడి, కేంద్రంలో అమలు జరుగుతున్న ‘ఆరోగ్య లక్ష్మి’ వంటి పథకాలపై వివరాలు తెలుసుకున్నారు. పిల్లల తల్లిదండ్రులను కూడా అడిగి కేంద్రం నిర్వహణపై వారి అభిప్రాయాలను తెలుసుకున్నారు. కేంద్రం పరిశుభ్రత, పిల్లలకు నాణ్యమైన పౌష్టికాహారం అందించడంపై ప్రత్యేక శ్రద్ధ వహించాలని సిబ్బందికి సూచించారు.

చిత్రం న్యూస్, జైనథ్: జైనథ్ మండలం కూర గ్రామంలోని శ్రీ వెంకటేశ్వర స్వామి ఆలయ ప్రాంగణంలో భక్తుల సౌకర్యార్థం మరుగుదొడ్ల నిర్మాణానికి బుధవారం భూమి పూజ నిర్వహించారు. 4.50 లక్షల నిధులతో నిర్మాణ పనులను చేపట్టారు. ఈ కార్యక్రమంలో మాజీ ఎంపీపీ బీఆర్ఎస్ నాయకుడు మార్చెట్టి గోవర్ధన్, బీజేపి కిసాన్ మోర్చ మండల అధ్యక్షుడు ఏనుగు రాకేష్ రెడ్డి, ఆలయ కమిటీ గౌరవ అధ్యక్షులు సామ వెంకట్ రెడ్డి హాజరై, శాస్త్రోక్తంగా పూజలు నిర్వహించి పనులను ప్రారంభించారు. ఈ సందర్భంగా వారు మాట్లాడుతూ.. ఆలయానికి వచ్చే భక్తులకు ఎలాంటి ఇబ్బందులు కలగకుండా అన్ని వసతులు కల్పించడమే తమ ధ్యేయమని పేర్కొన్నారు. గ్రామానికి చెందిన కొంగల భూమన్న, సామ సంజీవ్ రెడ్డి, బీమ్ రెడ్డి, లింగారెడ్డి తదితరులు పాల్గొన్నారు.