యువతను సన్మార్గంలో నడిపేందుకే ప్రీమియర్ లీగ్ పోటీలు

పోలీస్ కమిషనరేట్, సెక్యూరిటీ కౌన్సిల్ ఆధ్వర్యంలో ర్యాలీ

ర్యాలీని ప్రారంభించిన పోలీస్ కమిషనర్ సాయి చైతన్య 

చిత్రం న్యూస్, నిజామాబాద్ బ్యూరో:  యువతను సన్మార్గంలో నడిపేందుకే ప్రీమియర్ లీగ్ పోటీలు నిర్వహిస్తున్నామని నిజామాబాద్ పోలీస్ కమిషనర్ సాయి చైతన్య స్పష్టం చేశారు. యువత చెడు మార్గంలో కాకుండా తమ ఉజ్వల భవిష్యత్తు కోసం సక్రమ మార్గాన్ని ఎంచుకోవాలని ఆయన సూచించారు. నిజామాబాద్ పోలీస్ కమిషనరేట్, సెక్యూరిటీ కౌన్సిల్ ఆధ్వర్యంలో నిజామాబాద్ ప్రీమియర్ లీగ్ ర్యాలీ శనివారం ఉదయం జిల్లా క్రీడా అథారిటీ మైదానం నుండి పాలిటెక్నిక్ గ్రౌండ్ వరకు నిర్వహించారు. ఈ లీగ్ ర్యాలీని పోలీస్ కమిషనర్ పి. సాయి చైతన్య జెండా ఊపి ప్రారంభించారు.

ఈ సందర్భంగా పోలీస్ కమిషనర్ మాట్లాడుతూ నిజామాబాద్ సెక్యూరిటీ కౌన్సిల్ ఆధ్వర్యంలో ప్రీమియర్ లీగ్ నిర్వహిస్తుండడం ఎంతో గర్వకారణమని, నిజామాబాద్ జిల్లా నుండి ఎంతోమంది క్రీడాకారులను దేశానికి అందించినటువంటి ఘనత జిల్లాకు ఉండడం ఎంతో సంతోషకరమైన విషయం అని, ఈ ప్రీమియర్ లీగ్ లో క్రికెట్, వాలీబాల్, కబడ్డీ, బాస్కెట్ బాల్, యోగా మొదలగు క్రీడలు నిర్వహిస్తున్నారని సాయి చైతన్య అన్నారు. ఇందులో అన్ని మండలాల నుంచి క్రీడాకారులు పాల్గొన్నారని వెల్లడించారు. ఈ క్రీడలలో గెలుపొందిన వారికి ప్రైజ్ మనీ కూడా డిక్లేర్ చేయడం జరిగిందని అన్నారు. యువతను సన్మార్గంలో నడిపించాలని ఉద్దేశంతో యువతను ప్రోత్సహించే విధముగా ఈ యొక్క సమ్మర్ క్యాంపు నిర్వహిస్తున్నరని, కోవిడ్ సమయంలో నిజామాబాద్ జిల్లా వ్యాప్తంగా దాదాపు 200 మంది చనిపోయారని రోడ్డు ప్రమాదాల వలన నిజామాబాద్ జిల్లాలో 2025 సంవత్సరంలో 300 మంది మరణించారని వివరించారు.ప్రధానముగా ట్రాఫిక్ నిబంధనలు పాటించకపోవడం వలన ఈ యొక్క ప్రమాదాలు ఎక్కువగా జరుగుతున్నాయని గమనించాలని సీపీ అన్నారు. ట్రాఫిక్ నిబంధనలు పాటించిన వారు క్షేమంగా తమ గమ్యానికి చేరుకుంటున్నారని ప్రతి ఒక్కరు ట్రాఫిక్ నియమ నిబంధనలను తూచ తప్పకుండా పాటించాలని పిలుపునిచ్చారు. ,

యువత డ్రగ్స్, సైబర్ నేరాల పట్ల జాగ్రత్తగా ఉండాలని సూచించారు. ప్రతి ఒక్కరితో సే నో టు డ్రగ్స్, సే ఎస్ టూ స్పోర్ట్స్ అనే నినాదం చేయించడం జరిగింది. యువత మీదనే దేశ భవిష్యత్తు ఆధారాలు ఉంటుందని యువత సన్మార్గంలో నడిచినప్పుడే అది సాధ్యమవుతుందని అందుకే ఈ యొక్క సమ్మర్ క్యాంపు ద్వారా ఈ ప్రీమియర్ లీగ్ ఏర్పాటు చేశామని సీపీ వెల్లడించారు.. అనంతరం కాగడాతో క్రీడా ర్యాలీని ప్రారంభించి, క్రీడా ర్యాలీ పాత కలెక్టరేట్ గ్రౌండ్ నుంచి కోర్టు చౌరస్తా, మున్సిపల్ కార్యాలయం, ఎన్టీఆర్ చౌరస్తా, పోలీస్ కార్యాలయం, విజయ్ థియేటర్, రైల్వే కమాన్, అయ్యప్ప దేవాలయం, మీ-సేవ, పాలిటెక్నిక్ గ్రౌండ్ వరకు నిర్వహించారు.ఈ కార్యక్రమంలో డీసీపీ బస్వా రెడ్డి, జనరల్ సెక్రెటరీ కవిత రెడ్డి, స్పోర్ట్స్ కో-ఆర్డినేటర్ శ్రీనివాస్ రెడ్డి, జాయింట్ సెక్రెటరీ రజనీకాంత్, ట్రెజరర్ సంతోష్ వివిధ విభాగాల్లో జాయింట్ సెక్రటరీలు శిరీష్, పితాని, శివప్రసాద్, గణేష్ గుప్తా ఫిజికల్ ఎడ్యుకేషన్ టీచర్స్, నిజామాబాద్ యువత, క్రీడాకారులు, విద్యార్థులు పాల్గొని దిగ్విజయం చేశారు.

జైనథ్ బస్ స్టాండ్ ఆవరణలో చలివేంద్రం ప్రారంభం

చిత్రం న్యూస్, జైనథ్: పెరుగుతున్న ఎండల తీవ్రతను దృష్టిలో ఉంచుకుని, ప్రయాణికులు, బాటసారుల దాహార్తిని తీర్చడానికి జైనథ్ గ్రామ పంచాయతీ ప్రత్యేక చొరవ తీసుకుంది. స్థానిక బస్ స్టాండ్ ఆవరణలో గ్రామ పంచాయతీ ఆధ్వర్యంలో ఏర్పాటు చేసిన చలివేంద్రాన్ని ఈరోజు ఘనంగా ప్రారంభించారు.

వేసవి తాపం నుండి ప్రజలకు ఉపశమనం కలిగించడమే ధ్యేయంగా ఈ కేంద్రాన్ని ఏర్పాటు చేసినట్లు పంచాయతీ ప్రతినిధులు తెలిపారు. ముఖ్యంగా దూర ప్రాంతాల నుండి వచ్చే ప్రయాణికులకు, కూలీలకు, రైతులకు ఇది ఎంతో ప్రయోజనకరంగా ఉంటుందని పేర్కొన్నారు. వేసవిలో ప్రజలకు స్వచ్ఛమైన తాగునీరు అందించడమే లక్ష్యమన్నారు.

ఈ కార్యక్రమంలో పంచాయతీ కార్యదర్శి ముజీబ్, ఉప సర్పంచ్ పిడుగు సంతోష్ యాదవ్, కాంగ్రెస్ పార్టీ సీనియర్ నాయకుడు జగదీశ్ రెడ్డి, బీజేపీ గ్రామ అధ్యక్షుడు చిలుకూరి లింగారెడ్డి,వార్డు సభ్యులు కోవ సారథి, స్వామి, గంగన్న, పరశురాం, గ్రామ పెద్దలు పలు పార్టీల నాయకులు పాల్గొన్నారు.

బీజేపీ ఎంపీ తేజస్వి వ్యాఖ్యలపై బేల కాంగ్రెస్ నేతల ఫైర్

చిత్రం న్యూస్, బేల : పార్లమెంటులో బీజేపీ ఎంపీ తేజస్వీ సూర్య ఆంధ్రప్రదేశ్-తెలంగాణ విభజనపై చేసిన వివాదాస్పద వ్యాఖ్యలపై బేల మండల కాంగ్రెస్ నాయకులు తీవ్ర ఆగ్రహం వ్యక్తం చేస్తూ..స్థానిక శివాజీ చౌక్ వద్ద ధర్నా చేపట్టారు. ఈ సందర్బంగా కాంగ్రెస్ పార్టీ మండల అధ్యక్షులు ఫైజుల్లా ఖాన్ మాట్లాడుతూ..తెలంగాణ ఏర్పాటును భారత్ పాకిస్తాన్ విభజనతో పోల్చుతూ ఎంపీ తేజస్వి సూర్య లోక్ సభలో చేసిన వివాదాస్పద వ్యాఖ్యలను ఖండిస్తున్నామన్నారు. ఈ వ్యాఖ్యలు నాలుగున్నర కోట్ల తెలంగాణ ప్రజల ఆత్మగౌరవాన్ని దెబ్బతీసేలా ఉన్నాయని, వందలాదిమంది విద్యార్థుల ఆత్మబలి దానాలకు చలించి నాలుగున్నర కోట్ల తెలంగాణ ప్రజల అభీష్టం మేరకు  సోనియా గాంధీ తెలంగాణ రాష్ట్రాన్ని ఇచ్చిందని, ఒక రాజ్యాంగబద్ధమైన పదవిలో ఉండి ఇలాంటి వ్యాఖ్యలు చేయడం దురదృష్టకరమని మండిపడ్డారు. విద్యార్థుల ఆత్మ బలిదానాలతో త్యాగాల పునాదుల మీద ఏర్పడిన తెలంగాణను ఇండియా, పాకిస్తాన్ విభజనతో పోల్చిన ఎంపీ వెంటనే రాజీనామా చేయాలని డిమాండ్ చేశారు.తేజస్వి సూర్య బేషరతుగా నాలుగున్నర కోట్ల తెలంగాణ ప్రజలకు క్షమాపణ చెప్పాలని డిమాండ్ చేశారు. ఈ కార్యక్రమంలో మాజీ  జడ్పీటీసీ రాందాస్ నాక్లే, మార్కెట్ వైస్ చైర్మన్ విలాస్ పటేల్, కిసాన్ సెల్ ఎస్టీ సెల్ అధ్యక్షులు ఘన్ శ్యామ్ గవాండే, చంద్రకాంత్ మడావి, ఆత్మ డైరెక్టర్,ఈశ్వర్ ధోటే, సర్పంచులు గంబీర్ థాక్రే, శంకర్ భోక్రె, గులాబ్ గేడాం, అవినాష్ గోడే, బాపురావు దడంజె, సాగర్ థాక్రె నాయకులు సుదర్శన్,  కన్నె రాజు, గోపతి శంకర్, యువ నాయకులు హేమంత్ పటేల్, రవి గట్లేవార్, మహబూబ్ ఖాన్, మొబిన్ ఖురేషి తదితరులు పాల్గొన్నారు.

శనగ పంట కొనుగోలు చేయాలని రైతుల ధర్నా: మద్దతు తెలిపిన బీఆర్ఎస్ నాయకులు

 చిత్రం న్యూస్, బేల: ఆదిలాబాద్ జిల్లా బేల సబ్ మార్కెట్ యార్డులో గత 15 రోజుల నుంచి ప్రభుత్వం రైతుల శనగపంట కొనుగోలు చేయకపోవడంతో శనివారం రైతులు ధర్నా చేపట్టారు.మండల బీఆర్ఎస్ నాయకులు రైతులకు మద్దతుగా 353బీ జాతీయ రహదారిపై బైఠాయించి నిరసన తెలిపారు. ఈ సందర్భంగా బీఆర్ఎస్ పార్టీ యువ నాయకులు సతీష్ పవార్ మాట్లాడుతూ మండలంలో రైతులు 5,600 ఎకరాలల్లో శనగ పంట పండిస్తే కనీసం ఇప్పటివరకు ఈ ప్రభుత్వం 20% కూడా కొనుగోలు చేయకపోవడం సిగ్గుచేటు అని అన్నారు. మాజీ సీఎం కేసీఆర్ ప్రభుత్వం రైతులకు వెన్ను దన్నుగా ఉండి అన్ని విధాల ఆదుకుంటే, ఈ ప్రభుత్వ మాత్రం రైతుల పేరిట శాపంగా మారిందని ఆరోపించారు. విషయం తెలుసుకున్న తహసీల్దార్ సంబంధిత మార్క్ఫెడ్ డీఎంతో చరవాణిలో మాట్లాడించారు. సోమ, మంగళవారాల్లో కచ్చితంగా శనగ కొనుగోళ్లు ప్రారంభిస్తామని హామీ ఇచ్చి రైతులకు నచ్చజెప్పారు దీంతో వారు శాంతించి ధర్నాను విరమించారు. ఈ కార్యక్రమంలో సర్పంచ్ ఖోడే విపిన్, నాయకులు గోడే విశాల్, మధుకర్ భలేరావు, మండల రైతులు తదితరులు పాల్గొన్నారు.

జైనథ్ మార్కెట్‌యార్డులో మొక్కజొన్న కొనుగోలు కేంద్రం ప్రారంభించిన ఎమ్మెల్యే పాయల్ శంకర్

చిత్రం న్యూస్,జైనథ్: రైతులు మార్కెట్‌లో డిమాండ్ ఉన్న పంటలను సాగు చేయడం ద్వారానే ఆర్థికంగా నిలదొక్కుకోగలరని ఆదిలాబాద్ ఎమ్మెల్యే పాయల్ శంకర్ అన్నారు. శనివారం జైనథ్ వ్యవసాయ మార్కెట్ కమిటీ (AMC) ఆవరణలో మొక్కజొన్న కొనుగోలు కేంద్రాన్ని జైనథ్ వ్యవసాయ కమిటీ చైర్మన్ అల్లూరి అశోక్ రెడ్డి తో కలిసి ఆయన అధికారికంగా ప్రారంభించారు.

ఈ సందర్భంగా ఎమ్మెల్యే మాట్లాడుతూ, రైతులు దళారులను నమ్మి మోసపోవద్దని, ప్రభుత్వం కల్పిస్తున్న మద్దతు ధరను సద్వినియోగం చేసుకోవాలని సూచించారు. ప్రస్తుత యాసంగి సీజన్‌లో పండించిన ప్రతి గింజను కొనుగోలు చేసేలా ప్రభుత్వం చర్యలు తీసుకుంటోందని తెలిపారు. మార్కెట్ పరిస్థితులకు అనుగుణంగా, అధిక డిమాండ్ ఉండే పంటల సాగుపై రైతులు దృష్టి సారించాలని ఆయన కోరారు.

ఈ కార్యక్రమంలో బీజేపీ కిసాన్ మోర్చా జిల్లా అధ్యక్షుడు కట్కం రాందాస్, బీజేపీ మండల అధ్యక్షుడు కరుణాకర్ రెడ్డి, బీజేపి నాయకులు పిడుగు సంతోష్ యాదవ్,చిలుకూరి లింగారెడ్డి, అశోక్ రెడ్డి, దేవన్న, వెంకట్ రెడ్డి, సారథి, మార్కెట్ కమిటీ సభ్యులు, స్థానిక ప్రజాప్రతినిధులు, వ్యవసాయ శాఖ అధికారులు పాల్గొన్నారు.

ఆదిలాబాద్ విమానాశ్రయ ఏర్పాటుకు పూర్తి సహకారం: ఇంఛార్జి కలెక్టర్ యువరాజ్ మర్మాట్

చిత్రం న్యూస్,ఆదిలాబాద్:

ఆదిలాబాద్ జిల్లాలో విమానాశ్రయ ఏర్పాటుకు జిల్లా యంత్రాంగం తరపున పూర్తి స్థాయిలో సహకారం అందిస్తామని ఇంఛార్జి కలెక్టర్ యువరాజ్ మర్మాట్ స్పష్టం చేశారు. శుక్రవారం కలెక్టరేట్ సమావేశ మందిరంలో స్థానిక ఎమ్మెల్యే పాయల్ శంకర్‌తో కలిసి ఆయన ఉన్నత స్థాయి సమీక్షా సమావేశం నిర్వహించారు.

ఈ సందర్భంగా విమానాశ్రయానికి అవసరమైన భూసేకరణ, మౌలిక సదుపాయాల కల్పనపై అధికారులతో చర్చించారు. జిల్లా ప్రజల చిరకాల స్వప్నమైన విమానాశ్రయం అందుబాటులోకి వస్తే ఈ ప్రాంతం పారిశ్రామికంగా, ఆర్థికంగా ఎంతో అభివృద్ధి చెందుతుందని ఈ సందర్భంగా అభిప్రాయపడ్డారు.

ఈ సమావేశంలో అదనపు కలెక్టర్ ఆర్.ఎస్. చిత్రు, ఆర్డీఓ స్రవంతితో పాటు ఎయిర్ ఫోర్స్ అధికారులు రాహుల్ శుక్ల, ఎస్.జి. హెడ్గే, జెపి సబర్వాల్, రాజీవ్ తదితర అధికారులు, సిబ్బంది పాల్గొన్నారు. ఎయిర్‌పోర్ట్ నిర్మాణానికి సంబంధించి ఎదురవుతున్న సాంకేతిక అంశాలను, క్షేత్రస్థాయి పరిస్థితులను అధికారులు కలెక్టర్‌కు వివరించారు.