చిత్రం న్యూస్, నిర్మల్ :.రాష్ట్ర ముఖ్యమంత్రి రేవంత్ రెడ్డి రైతుల సంక్షేమాన్ని దృష్టిలో ఉంచుకొని రైతు భరోసా నిధులను విడుదల చేశారని మండల కాంగ్రెస్ పార్టీ అధ్యక్షుడు భోల్లోజి నర్సయ్య, జిల్లా కాంగ్రెస్ పార్టీ కోశాధికారి దశరథ రాజేశ్వర్ అన్నారు. ఈ నిధుల విడుదలను పురస్కరించుకొని బుధవారం సారంగాపూర్ మండల కేంద్రంలోని రైతు వేదిక భవనంలో కాంగ్రెస్ పార్టీ ఆధ్వర్యంలో సీఎం రేవంత్ రెడ్డి చిత్రపటానికి పాలాభిషేకం చేశారు. ఈ సందర్భంగా మాట్లాడుతూ, ప్రతి రైతుకు ఎకరానికి రూ. 6 వేల చొప్పున నిధులు విడుదల చేయడం జరిగిందని, ఈ మొత్తాన్ని విడతల వారీగా రైతు భరోసా పథకం ద్వారా అందజేస్తామని నాయకులు వెల్లడించారు. యాసంగి పంటల సాగుకు అవసరమైన విత్తనాలు, ఎరువులు సద్వినియోగం చేసుకొని అధిక దిగుబడులు సాధించాలని రైతులను వారు ప్రోత్సహించారు. ప్రభుత్వం రైతు సంక్షేమానికి కట్టుబడి ఉందని, ఈ పథకం ద్వారా రైతులకు ఆర్థికంగా అండగా నిలుస్తుందని వారు పేర్కొన్నారు. ఈ కార్యక్రమం రైతులకు మరింత మేలు చేకూరుస్తుందని వారు ఆశాభావం వ్యక్తం చేశారు.ఈ కార్యక్రమంలో గ్రామ సర్పంచ్ కునేరు భూమన్న, కాంగ్రెస్ పార్టీ మండల ఉపాధ్యక్షులు విలాసరావు, మార్కెట్ డైరెక్టర్ సుభాష్ రెడ్డి, నాయకులు సురేందర్, సత్యం, ఓలా త్రీ నారాయణరెడ్డి, నవీన్ రెడ్డి, వంగ భూమారెడ్డి, దాసరి రమేష్, మైలి రాజేశ్వర్, జాదవ్ ప్రకాష్, రైతులు, పార్టీ నాయకులు తదితరులు పాల్గొన్నారు.

చిత్రం న్యూస్, భైంసా: 99 రోజుల ప్రజాపాలన కార్యక్రమంలో భాగంగా కళాశాలలో విద్యార్థుల్లో దేశ సేవ పట్ల చైతన్యం పెంపొందించుటకు సాయుధ దళాలలో ఉపాధి అవకాశాలపై అవగాహన కల్పించుటకు అగ్నివీర్ పథకంపై భైంసా ప్రభుత్వ డిగ్రీ కళాశాలలో అవగాహన కార్యక్రమం నిర్వహించారు. ఈ సందర్భంగా ప్రిన్సిపాల్ శ్రీ బుచ్చయ్య మాట్లాడుతూ, విద్యార్థులు చిన్న వయస్సు నుంచే దేశ సేవ పట్ల ఆసక్తి పెంపొందించుకోవాలని, అగ్నివీర్ వంటి పథకాలు యువతకు మంచి అవకాశాలను అందిస్తున్నాయని పేర్కొన్నారు. క్రమశిక్షణ, కృషి, పట్టుదలతో ఈ అవకాశాలను సద్వినియోగం చేసుకోవాలని ఆయన సూచించారు.కార్యక్రమానికి హాజరైన IQAC కోఆర్డినేటర్ డా. రవి కుమార్ విద్యార్థులను ఉద్దేశించి మాట్లాడుతూ, యువత దేశ నిర్మాణంలో కీలక పాత్ర పోషించవలసిన అవసరాన్ని వివరించారు. అగ్నివీర్ పథకం ద్వారా లభించే అవకాశాలను సద్వినియోగం చేసుకొని నైపుణ్యాలను అభివృద్ధి చేసుకోవాలని సూచించారు.

డా.ఎం.శంకర్ అగ్నివీర్ పథకంపై సమగ్ర పవర్ పాయింట్ ప్రజెంటేషన్ నిర్వహించారు. అర్హతలు, ఎంపిక విధానం, శారీరక, వైద్య ప్రమాణాలు, వ్రాత పరీక్ష సిలబస్ వంటి అంశాలను స్పష్టంగా వివరించి విద్యార్థులకు సమగ్ర అవగాహన కల్పించారు. అలాగే ఈ పథకం ద్వారా లభించే శిక్షణ, ఆర్థిక ప్రయోజనాలు, భవిష్యత్ కెరీర్ అవకాశాలపై విద్యార్థులను ప్రేరేపించారు.ఈ కార్యక్రమంలో వైస్ ప్రిన్సిపాల్ డా.రఘునాథ్,  సీనియర్ అధ్యాపకులు డా. భీమా రావు , రాజు పాల్గొని విద్యార్థులకు మార్గదర్శక సూచనలు అందించారు. విద్యార్థులు పెద్ద సంఖ్యలో పాల్గొని కార్యక్రమాన్ని విజయవంతం చేశారు. కార్యక్రమం అనంతరం నిర్వహించిన సందేహ నివృత్తి సమావేశంలో విద్యార్థులు తమ సందేహాలను నివృత్తి చేసుకున్నారు. మొత్తం కార్యక్రమం విద్యార్థుల్లో దేశభక్తి, క్రమశిక్షణ మరియు బాధ్యతాభావాన్ని పెంపొందించుటలో ఫలప్రదంగా నిలిచింది.

చిత్రం న్యూస్, బాసర:నిర్మల్ జిల్లా బాసరలోని రాజీవ్ గాంధీ యూనివర్సిటీ ఆఫ్ నాలెడ్జ్ టెక్నాలజీస్ (RGUKT)లో డీఎస్పీగా పి.సాయి కిరణ్ బుధవారం బాధ్యతలను స్వీకరించారు. శాంతి భద్రతల పరిరక్షణ, విద్యార్థులు, సిబ్బందికి భద్రత కల్పించడం, అలాగే యూనివర్సిటీతో సమన్వయం చేసుకుంటూ విధులను సమర్థవంతంగా నిర్వహించనున్నట్లు తెలిపారు. యూనివర్సిటీ యాజమాన్యం, విద్యార్థులు,  సిబ్బంది పోలీసులకు పూర్తి సహకారం అందించాలని కోరారు.

చిత్రం న్యూస్, బాసర:నిర్మల్ జిల్లాలోని బాసర శ్రీ జ్ఞాన సరస్వతి అమ్మవారి దర్శనానికి వచ్చిన ఓ భక్తురాలు పోగొట్టుకున్న తన మొబైల్ ఫోన్ ను బాసర ఆలయ సిబ్బంది  అప్పజెప్పి తమ నిజాయతీ చాటారు. జగిత్యాల జిల్లా కోరుట్ల మండలం గంభీరావుపేటకు చెందిన వనజ అనే భక్తురాలు ఆలయ ప్రాంగణంలో ఫోన్ ను మర్చిపోవడంతో అక్కడే విధులు నిర్వహిస్తున్న హోంగార్డ్లు శ్రీనివాస్, శోభారాణి గమనించి ఆలయ ఇన్స్పెక్టర్ సాయిలు కు అప్పజెప్పారు. వివరాల ఆధారంగా భక్తురాలిని పిలిపించి ఫోన్ ను అప్పజెప్పి  ఆలయ సిబ్బంది తమ నిజాయతీని  చాటారు. ఈ సందర్భంగా హోంగార్డులను పలువురు అభినందించారు.