అంగరంగ వైభవంగా దుర్గమ్మ శోభా యాత్ర 

చిత్రం న్యూస్, బాసర: నిర్మల్ జిల్లా బాసర మండల కేంద్రంలో కీర్గుల్ (కె) గ్రామంలో అంగరంగ వైభవంగా దుర్గమాత శోభాయాత్ర ఘనంగా నిర్వహించారు. నవరాత్రి ఉత్సవాల్లో దుర్గమాత అమ్మవారు తొమ్మిది రోజులు రోజుకో అలంకారంలో భక్తులకు దర్శనం ఇచ్చారు. అమ్మవారిని తొమ్మిది రోజులు తీరొక్క పూలతో వివిధ రకాల నైవేద్యం అమ్మవారికి సమర్పించారు. నవరాత్రి ఉత్సవాలు ముగింపు సందర్భంగా గురువారం రోజున విశేషంగా ఆకట్టుకుంది.   అమ్మవారి శోభాయాత్రలో మహిళలు,  ఆడపడుచులు బతుకమ్మ కోలాటాలతో భక్తిశ్రద్ధలతో అమ్మవారికి డీజే నడుమ శోభాయాత్రను ఘనంగా జరుపుకున్నారు. గ్రామస్తులు చల్లంగా ఉండాలని అమ్మవారిని వేడుకున్నారు. ఈ కార్యక్రమంలో  వీడీసీ  పెద్దలు, సభ్యులు, గ్రామ యువకులు, గ్రామస్తులు దుర్గమ్మ వెళ్ళి రావమ్మా అంటూ గంగమ్మ ఒడికి సాగనంపారు.

బాసర నుంచి మహోర్ జాతీయ రహదారి నిర్మాణానికి సర్వే చేపట్టండి

*ఎమ్మెల్యేకు లేఖ రాసిన కేంద్ర మంత్రి నితిన్ గడ్కరి

చిత్రం న్యూస్, బాసర: నిర్మల్ జిల్లా బాసర నుంచి మహోర్ హిమాయత్ నగర్ వరకు రెండు జాతీయ రహదారులను అనుసంధానం చేస్తూ జాతీయ రహదారి నిర్మాణానికి సర్వే చేపట్టాలని కేంద్ర ప్రభుత్వం సంబంధిత అధికారులకు ఆదేశాలు జారీ చేసింది. ఈ విషయాన్ని కేంద్ర మంత్రి నితిన్ గడ్కరి ముథోల్ ఎమ్మెల్యే పవార్ రామారావు పటేల్ కు లేఖ ద్వారా వివరించారు. గత మే నెల 5 న ఎమ్మెల్యే పవార్ రామరావు పటేల్ ఈ విషయంలో కేంద్ర మంత్రి నితిన్ గడ్కరిని కలిశారు. జాతీయ రహదారిని అనుసంధానం చేస్తే బాసర అమ్మ వారి క్షేత్రం నుండి మహోర్ రేణుక మాత టెంపుల్ కు ఆధ్యాత్మిక మార్గం ఏర్పడుతుందని విన్నవించారు.  స్పందించినందుకు ఎమ్మెల్యే రామారావు పటేల్ కేంద్ర మంత్రి నితిన్ గడ్కరికి కృతజ్ఞతలు తెలిపారు.

గ్రూప్-1 ఫలితాల్లో DSP ఉద్యోగానికి ఎంపికైన కరెండే మహేందర్ ను సన్మానించిన ముథోల్ మాజీ ఎమ్మెల్యే

చిత్రం న్యూస్, బాసర: నిర్మల్ జిల్లా బాసర మండల కేంద్రంలోని కీర్గుల్ (బి) గ్రామానికి చెందిన SI కరెండే మహేందర్  ఇటీవల విడుదల అయిన గ్రూప్ – 1 ఫలితాల్లో DSP ఉద్యోగానికి ఎంపికయ్యారు. సోమవారం భైంసా టౌన్ లోని కాంగ్రెస్ పార్టీ కార్యాలయంలో ముథోల్ నియోజకవర్గ కాంగ్రెస్ పార్టీ  ఇంఛార్జి, మాజీ ఎమ్మెల్యే  బోస్లే నారాయణరావు పాటిల్  శాలువాతో సత్కరించి శుభాకాంక్షలు తెలిపారు. ఈ కార్యక్రమంలో బ్లాక్ కాంగ్రెస్ పార్టీ అధ్యక్షులు శంకర్ చంద్రే, ముత్యం రెడ్డి, మాజీ మున్సిపల్ వైస్ చైర్మన్ ఓం ప్రకాష్ లడ్డ, బాసర మండల కాంగ్రెస్ పార్టీ సీనియర్ నాయకులు జంగం రమేష్, మాజీ ఎంపీపీ రామచంద్ర రెడ్డి, యువ నాయకుడు పురంశెట్టి రవికుమార్ తదితరులు పాల్గొన్నారు.

శ్రీ మహా గౌరీ దేవి అలంకారంలో భక్తులకు దర్శనం

*మూల నక్షత్రం సందర్భంగా బాసరలో భక్తుల సందడి 

చిత్రం న్యూస్, బాసర: నిర్మల్ జిల్లా బాసర పుణ్యక్షేత్రంలో భక్తుల రద్దీ నెలకొంది.  శ్రీ జ్ఞాన సరస్వతి అమ్మవారి మూల నక్షత్రం శుభదినం సోమవారం  కావడంతో అమ్మవారి సన్నిధిలో భక్తుల సందడి కనిపిస్తుంది. శ్రీ శరన్నవరాత్రి ఉత్సవాలు ఎనిమిదవ రోజు శ్రీ మహా గౌరీ దేవి అలంకారంలో భక్తులకు దర్శనమిచ్చారు. వైదిక బృందం అమ్మవారికి చక్కెర పొంగలిని నైవేద్యంగా సమర్పించారు. ఆలయానికి భక్తులు వేకువజాము నుంచి గోదావరి నదిలో పుణ్యస్నానమాచరించి అమ్మవారి దర్శనానికి క్యూ కట్టారు. దర్శనానికి గంటల సమయం పట్టింది. క్యూలో నిలబడ్డ వారికీ ఆలయ అధికారులు పాలు, బిస్కెట్లు పంపిణీ చేశారు. మంచి నీరు అందించేందుకు ఏర్పాటు చేశారు. భక్తులకు ఎలాంటి ఇబ్బందులు కలగకుండా ఆలయ ఈవో అంజనీ దేవి,  ముథోల్ సీఐ మలేష్, ఎస్సై బి.శ్రీనివాస్ భారీ బందోబస్తు ఏర్పాటు చేశారు.