రాష్ట్ర బీసీ సంక్షేమ శాఖ మంత్రి సవితని సన్మానిస్తున్న దాసరి రిజర్వేషన్ పోరాట సమితి సభ్యులు
చిత్రం న్యూస్, అమరావతి: వెనుబడిన తరగతుల ఆత్మగౌరవం పెంపొందించడమే కూటమి ప్రభుత్వ లక్ష్యమని రాష్ట్ర బీసీ, ఈడబ్ల్యూఎస్ సంక్షేమ, చేనేత మరియు జౌళి శాఖ మంత్రి ఎస్.సవిత తెలిపారు. బీసీలు గౌరవప్రదమైన జీవనం సాగించడానికి ఎన్నో పథకాలు అమలు చేస్తున్నామన్నారు. తమ ఆత్మ గౌరవానికి భంగం కలిగించే భిక్షాటన చేసేవారు అనే పదాన్ని తొలగింపు హర్షం వ్యక్తంచేస్తూ.. మంత్రి సవితకు దాసరి సామాజిక వర్గీయులు ధన్యవాదాలు తెలిపారు. ఈ మేరకు మంగళవారం అమరావతిలోని రాష్ట్ర సచివాలయంలో మంత్రి సవితను దాసరి రిజర్వేషన్ పోరాట సమితి సభ్యులు కలిశారు. ఇటీవల బీసీ-ఏ కేటగిరిలోని దాసరి సామాజిక వర్గానికి జారీచేసే కుల ధ్రువీకరణ పత్రంలో భిక్షాటన చేసేవారు అనే పదాన్ని తొలగించిన విషయం తెలిసిందే. ఈ సందర్భంగా మంత్రి సవిత మాట్లాడుతూ, బడుగు, బలహీన వర్గాల అభ్యున్నతే లక్ష్యంగా టీడీపీ ఆవిర్భవించిన విషయాన్ని గుర్తు చేశారు. అన్న ఎన్టీఆర్, ప్రస్తుత సీఎం చంద్రబాబునాయుడు ప్రభుత్వాలు బీసీలను ఆర్థికంగా, రాజకీయంగా, సామాజికంగా అభివృద్ధి చెందేలా ఎన్నో సంక్షేమ పథకాలు అమలు చేస్తున్నాయన్నారు. ముఖ్యంగా బీసీల ఆత్మగౌరవానికి సీఎం చంద్రబాబునాయుడు అధిక ప్రాధాన్యమిస్తున్నారన్నారు. దీనిలో భాగంగా బీసీ-ఏ కేటగిరిలో ఉన్న దాసరి కులస్తుల ఆత్మ గౌరవాన్ని పెంపొందించేలా కుల ధ్రువీకరణ పత్రాల్లో మార్పులు చేశామన్నారు. దాసరి పక్కన బ్రాకెట్లో భిక్షాటన చేసేవారు అనే పదాన్ని రాసేవారని, ఆ పదాన్ని తొలగిస్తూ కూటమి ప్రభుత్వం ఆదేశాలు జారీచేసిందని మంత్రి తెలిపారు. బీసీలు ఆత్మ గౌరవంతో జీవనం సాగించాలనేది సీఎం చంద్రబాబునాయుడు ధ్యేయమన్నారు. చరిత్రలో ఎన్నడూ లేనంతగా 2025-26 బడ్జెట్ లో రూ.47 వేల కోట్లు నిధులు కేటాయించారన్నారు. కుల వృత్తులకు అండగా నిలుస్తూ, రూ.1000 కోట్లతో ఆదరణ మూడో విడత పథకానికి శ్రీకారం చుడుతున్నామన్నారు. అంతకుముందు దాసరి రిజర్వేషన్ పోరాట సమితి సభ్యులు మాట్లాడుతూ, తమ ఆత్మగౌరవాన్ని నిలబెడుతూ, భిక్షాటన చేసేవారు అనే పదం కుల ధ్రువీకరణ పత్రాల్లో నుంచి తొలగించడంపై సీఎం చంద్రబాబుకు ధన్యవాదాలు తెలిపారు. టీడీపీకి, సీఎం చంద్రబాబుకు తమ జీవితాంతం రుణపడి ఉంటామని వారు తెలిపారు. ఈ సందర్బంగా మంత్రి సవితను వారు ఘనంగా సత్కరించారు. ఈ కార్యక్రమంలో దాసరి రిజర్వేషన్ పోరాట సమితి అధ్యక్షులు పి.రవి, ఇతర సభ్యులు పాల్గొన్నారు.
