బాసర అమ్మవారి ఆలయంలో ప్రముఖ దర్శకుడు హరీష్ శంకర్ పూజలు
చిత్రం న్యూస్, బాసర: నిర్మల్ జిల్లా బాసరలోని పవిత్ర పుణ్యక్షేత్రం శ్రీ జ్ఞాన సరస్వతి అమ్మవారి ఆలయంలో ప్రముఖ తెలుగు సినిమా దర్శకుడు హరీష్ శంకర్ ప్రత్యేక పూజలు చేసి తమ మొక్కులను చెల్లించుకున్నారు. ముందుగా ఆలయ అర్చకులు,అధికారులు దర్శకుడికి ఘనంగా స్వాగతం పలికారు. అనంతరం ఆలయ స్థానాచార్యులు ప్రవీణ్ పాఠక్ ఆయనకు అమ్మవారి తీర్థప్రసాదాలు అందజేసి ఆశీర్వాదించారు. ఈ సందర్భంగా ఆయన మాట్లాడుతూ గబ్బర్ సింగ్, ఉస్తాద్ భగత్ సింగ్, మిస్టర్ బచ్చన్, మిరపకాయ్ వంటి సినిమాలు విజయవంతం కావడానికి అమ్మవారి ఆశీస్సులేనన్నారు. ఆంధ్రప్రదేశ్ రాష్ట్ర ఉప ముఖ్యమంత్రి పవన్ కళ్యాణ్ చేతుల మీదుగా కొండగట్టు అంజన్న స్వామి ఆలయ అభివృద్ధి జరిగేందుకు కృషి చేస్తున్నారని, శ్రీ జ్ఞాన సరస్వతి అమ్మవారి ఆలయ అభివృద్ధి కోసం వారిని కూడా ఇక్కడికి తీసుకువచ్చి తన వంతుగా ఆలయ అభివృద్ధికి తోడ్పడే విధంగా చర్యలు చేపడతానన్నారు.వీరి వెంట ఆలయ ఏఈఓ గంగా శ్రీనివాస్, ఇన్స్పెక్టర్ సాయిలు, సీ సీ పర్యవేక్షకులు సాయి, అర్చకులు పవన్ దీక్షిత్ బాసర్కర్ హరీష్, వేద పండితులు సంజయ్, తదితరులు పాల్గొన్నారు.