* పోలీస్ నారీ శక్తి సిబ్బందిని అభినందించిన జిల్లా ఎస్పీ డా.జానకీ షర్మిల
చిత్రం న్యూస్, బాసర : నిజామాబాద్కు చెందిన ఓ మహిళ తన భర్తతో జరిగిన కుటుంబ కలహాల కారణంగా మనస్తాపానికి గురై ఇంటి నుండి వెళ్లిపోయింది. అనంతరం బాసర గోదావరి నదిలో ఆత్మహత్య చేసుకోవాలని ప్రయత్నించింది. ఈ విషయం తెలిసిన కుటుంబ సభ్యులు వెంటనే డయల్ 100కు సమాచారం అందించారు. డయల్ 100 సమాచారం అందుకున్న వెంటనే స్పందించిన పోలీస్, నారీ శక్తి బృందం సంఘటనా స్థలానికి చేరుకొని అప్రమత్తంగా వ్యవహరించి ఆ మహిళను ఆత్మహత్యకు పాల్పడకుండా ప్రాణాలను కాపాడారు. అనంతరం మహిళను కుటుంబ సభ్యులకు అప్పగించారు. ఈ సందర్భంగా విధుల్లో అప్రమత్తంగా వ్యవహరించిన పోలీస్ అక్కలు దీపిక, సుమేర లను జిల్లా ఎస్పీ డా.జి.జానకి షర్మిల ప్రత్యేకంగా అభినందించారు. పోలీస్ నారీ శక్తి,మహిళల భద్రత కోసం మాత్రమే కాకుండా, అత్యవసర పరిస్థితుల్లో కూడా ప్రాణాలను కాపాడడంలో కీలక పాత్ర పోషిస్తోందని ఎస్పీ తెలిపారు.
